تعالوا نتسلى فى الحب شوية

الحب اسمى و اجمل من انه يتشوه بسبب تفكير غلط

دى يمكن عنوان لموضوع بسبب اللى احنا وصلنا ليه .. و احنا هنا اقصد بيها الشباب

مبقاش فيه وفاء ولا مبقاش فيه مشاعر خالص ولا ايه السبب


مبقاش فيه حد يقدر مشاعر اى شخص حتى لو كان الشخص ده هو اللى بيحبه و بيخاف على جرحه

مش هقول كل الناس بس الحكاية كبرت و اللى اتجرحوا بيزيدوا

مش هكدب و اقول ان انا عمرى ما اتسليت فى الحب بالعكس انا اتسليت لحد ما وصلت لنهاية كانت متوقعة ليا و خلتنى اخاف اصارح اللى بحبها حب صادق دلوقتى عن اى ماضى ليا فى الحب لان ببساطة مكانش فيه حب كان مجرد خداع و رسم انا رسمته

ده حال شباب كتير مش انا بس

الولد بقا عاوز يثبت ان مفيش احسن منه و ان كل البنات بيموتوا على نظرة منه

و البنت عاوز تاخد ثقتها فى نفسها و تحس ان هى ليها قيمة اكبر من اى بنت تانية

و كل ده بيكون على حساب انسان غلبان انضحك عليه و صدق المشاعر الكدابة دى


17 % زواج عرفى فى الجامعات المصرية

خبر زى ده اول نسمعه نقول يا ترى الظروف هى السبب ولا الحب الكاذب هو السبب

ما هو مش هيرتبطوا ببعض غير لو فيه حب بينهم و الحب ده ازاى يكون حقيقى و بيخافوا على بعض و قبلوا بالوضع ده اللى غالبا هينتج عنه اطفال يعيشوا فى مأساه


نفسى ملاقيش حد مجروح و السبب التسلية اللى بقت بدل الحب

نفسى لما اسمع كلمة "حب" احس بالامان و بالمشاعر اللى فيها و مفكرش هل ده فعلا حقيقى ولا كدب و وهم

نفسى اى حد بيتسلى فى الحب يلاقى نهاية للتسلية دى و يعرف طريقو الصح

نفسى الحب يرجع نضيف تانى

ندمان و يارتنى انسا اى لحظه انا كنت بتسلى فيها بالحب

عايز اسأل

- انت اتسليت بالحب قبل كدة

- ايه شعورك لو حد اتسلى بمشاعرك و اعتبرك مجرد نمرة بالنسباله يرميها وقت ما يحب