الاخلاص و الزمن الجميل . هى بقت كدة يعنى !!

اولا انا سعيد جدا ان موضوعى السابق عن التسلية فى الحب وجد تجاوب من الاعضاء و رفع من روح قلمى المعنوية عشان اكتبلكم من تانى

و انا بتكلم مع شخص عن الحب جه الكلام عن الاخلاص و كان رده اكيد اللى يعمل كدة لازم يكون من الزمن الجميل !

الايام اللى فاتت خلاص و عدت ...

و جاتلى الفكرة ان المرادى هتكلم عن الاخلاص او الوفاء و هو ما اعتبره عكس كلمة الخيانة

-----------

ايه هو الاخلاص فى الحب ( وجهت نظرى و تحتمل الصواب او الخطأ)

انك تفضل متذكر الشخص اللى بتحبه

انك متفكرش فى غيرو ابدا لو حتى لقيت الاحسن منه مليون مرة

انه مهما بعد عنك صورته تفضل فى قلبك و حبه مالى حياتك


ساعات بيحكوا عن اللى مات فى حضن حبيبته و بيحكوا عن اللى بقا عايش جسم بدون روح بعد ما فقد حبيبته ..


طب ما بدل ما ارغى فى الحكاية دى , ايه رأيكم لو نحكى قصة صغيرة جدا تخليكم تشعروا بمعنى الاخلاص فعلا و تأثير عدم وجوده

------------

هنحكى عن احمد المخلص و الطيب و نهلة الانانية و اللى متعرفش يعنى ايه اخلاص و كان فى يوم انهم حبوا بعض و عاشوا ايام جميلة على احلام وردية للى مستنيهم فى المستقبل

بس لظروف احمد فى انه لازم يكون نفسه اختار الطريق الصعب و قرر انه يسافر و يشتغل


و مرت الايام و احمد كان بيصبر نفسه فى الغربة بصورة نهلة

لحد ما رجع احمد و قابل والدته اللى حس انها مخبيه عنه حاجة

سألها مالك يا امى قالتله نهلة شافت طريقها و اتخطبت لواحد غنى

و كان رد فعل احمد انه ضحك و قالها انتى بتهزرى معايا صح ؟ لا انا هروح اكلم نهلة هى اكيد زعلت منى عشان انا اتأخرت عليها فى السفر بس انا والله مكانش بايدى

لكن احمد بص فى عيون والدته و شاف الدموع و سكت شوية و بعدين دموعه نزلت ..

-----------

محبتش اطول فى القصة عشان الموضوع بيتكلم عن الاخلاص مش اكتر بس انا حبيت اوصل الفكرة كلها بالقصة دى


نيجى بقا للاسئلة

- تفتكر الاخلاص اصبح شيئ من الماضى او الزمن الجميل زى ما بيقولوا ؟

- فيه علاقة بين عدم الاخلاص و الخيانة ؟

- تعمل ايه لو حبيت حد ميعرفش حاجة اسمها اخلاص و وصلت لمرحلة انك متقدرش تبعد عنه خالص ؟

- سؤال هتجاوب عليه بينك و بين نفسك .. هل انت مخلص ؟




فى النهاية اتمنى ان الموضوع يكون نال اعجابكم